Jieun 3 sisindian paparikan anu eusina piwuruk

Sisindiran nyaeta salahsahiji rupa puisi anu aya dina sastra Sunda. Umpama ditilik tina wangun kekecapannana, aya tilu rupa sisindiran, nyaeta paparikan, rarakitan jeung wawangsalan. Umpama dina sastra Indonesia, sisindiran sarua hartina jeung pantun. Umpama ditilik tina wangun eusina, aya dua rupa puisi Sunda, nyaeta puisi anu eusina mangrupa carita jeung puisi anu eusina henteu mangrupa carita. Conto puisi Sunda anu eusina mangrupa carita nyaeta saperti wawacan jeung carita pantun. Sedengkeun conto puisi Sunda anu eusina henteu mangrupa carita nyaeta sisindiran, mantra, guguritan, jeung sajak.

Saperti disebutkeun di luhur, sisindiran nyaeta sarua jeung pantun anu aya dina sastra Indonesia. Dina puisi Sunda oge aya anu disebut carita pantun. Tapi carita pantun beda jeung sisindiran atawa pantun anu aya dina sastra Indonesia. Carita pantun nyaeta puisi Sunda anu eusina mangrupa carita, sedengkeun sisindiran nyaeta puisi Sunda anu esusina henteu mangrupa carita. Umpama ditilik tina eusi atawa maksudna, aya sisindiran anu eusina mangrupa piwuruk, aya sisindiran anau eusina mangrupa sislihasih, jeung aya oge sisindiran anu eusina mangrupa sesebred atawa heureuy. Dihandap dijentrekeun tilu conto sisindiran paparikan anu eusina mangrupa piwuruk:

Hirup ulah popolotot
Bisi moal boga batur
Kudu inget pesen kolot
Jeung dulur teh kudu akur

Hirup karasana senang
Komo mun sagala aya
Lamun hayang hirup tenang
Kudu ulah loba gaya

Hirup natangga sing raket
Kudu sering gotong-royong
Mun hayang hirup salamet
Ulah jadi jalma sombong